طبعاً هوجة الأبراج قوية اليومين دول، وبقينا تقريباً نبنى علاقتنا على هذا الأساس. يعنى ممكن تتجنب شخص علشان هو برج معين بيتمتع بصفات معينة انتى/انت مش بتحبيها/بتحبها. فقلت أسهل عليكم، وألخص لكم الموضوع:

١. برج الحمل

٢١ مارس – ٢٠ ابريل

ما تطوليش كتير مع راجل الحمل، وماتماطليش كتير، اللى فى دماغه فى دماغه. وهـ يفضل مصمم على اللى بيعمله، وهـ يتحمل عاقبة قراراته، فانتى برا الموضوع. ماتجيش تقولى له مش قلتلك؟ هو عارف وفاهم كويس قوي انه عك الدنيا.

متهور ومندفع، وبياخد قرارات بسرعة جداً، فانتى تتحمسى معاه وتقولى تمام. وأنا كمان اتحمست يالله بينا … هوب! يزهق ويغير رأيه ويقلق، و”لأ خلاص أنا قفلت”. وانتى لسه بتقولى أصبحنا وأصبح الملك لله.

هو كوميدى ساخر، لدرجة الغلاسة، والغتاتة فى آراءه. كريم… كريييييم قوى… كرييييم قوى قوى قوى… لدرجة إنه ممكن على أول الشهر ما يبقاش معاه فلوس.، لإنه صرفها فى قعدة صحاب ظريفة.

جيبى شمسية علشان هـ تاخدى دش مشاعر وشغف، وشوق وغرام، وحنين.

حب من أول نظرة، بحبك، انتى الإنسانة اللى بدوّر عليها، يالله نتجوز، ونحقق اللى نفسنا فيه ونجيب ولد، ونسميه… أنا خلاص مش قادر أكمل… أنا قفلت.

نصيحة: صقفيله، وقولى له براڤو على كل حاجة، وكل مشروع، وكل انجاز عمله، حتى لو كان بالنسبه لك تافه، ما تعلقيش، اعملى زى الأم اللى واقفة فى آخر الصالة بتشجع ابنها يمشى ويجيلها. والنبي… خليه يخلص أى حاجة من مشاريعه المتعلقة دى، انجزيه علشان ينجز نفسه.

٢. برج الثور

٢١ ابريل – ٢١ مايو

هـ تتوقعى إيه من الثور؟ أكيد العند، ونشفان الدماغ، والإصرار على الشئ، وهـ يفضل وراه، مفيش مرونة، ولا ليونة. هـ تخبطى فى حيطة ناشفة، لو بتتناقشى فى حاجة مش عاجباه، أو هو مش شايف منطق فيها. هـ يبتدى يدخل مرحلة الثبات الشتوى؛ يدخل جوة كهف، ويصّدر الطارشة.

لما بيبقى عنده هدف محدد، ما بيشفش غيره، بالظبط زى الثور لما بيشوف القماشة الحمرا، راسه وألف سيف إنه يوصلها، وبيوصل لمرحلة انك مش موجودة، وهدفه هو العالم.

كسول جداً، على قد ما هو صبور، على قد ما هو بتاع أنتخة. لو طلبتى منه حاجة هو مش حاببها أو متحمس ليها،  يبقى لو القيامة قامت ما هـ يحرك عضلة.

مادى جداً جدًا جداً، والحاجات الغالية الشيك بتخلى عينه تلمع. بيحب يروش نفسه، ويدلع نفسه فى الفلوس، ومهم عنده مظهره الإجتماعي جداً وشكله. تلاقيه باع عربيته الـ Lada علشان يجيب ساعة Rolex.

حبه بيبقى فى شكل غيرة وتملك. وما تتوقعيش ورد وsurprises والحركات دى، برا عنه تماماً، العيب مش فيكى خالص.

نصيحة: البسى، واتشيكى، واتزوقى، وروحى ادفعيلك ٨٠٠ جنيه فى الكوافير كل مرة. البسى اللى على الحبل، وانزلى جيبيلك صباع روچ، ادلقى إزازة بارفان عليكى. البرج ده بيحب الجمال، بيحب يمتع عينيه، ربنا معاكي.

 ٣. برج الجوزاء

٢٢ مايو – ٢١ يونيو

مبروك انتى بتحبى واحد عنده انفصام! وكل واحد بشخصية، فـ ربنا معاكى. هو حاد جداً فى الفكر، وبيدقق فى التفاصيل. بس طبعاً ممكن بسهولة يتشتت ويفقد تركيزه، ويسرح ويمرح فى المروحة اللى فى السقف دى. ومش بيعرف ياخد قرار حاسم. فـ اتعودى تسمعى كلمة “مش عارف”.

كلمة السر: مزاجى، وملول من كل حاجة فى حياته، شغله، لبسه، ستايله، أى حاجة. وعادى ممكن يزهق من صحابه أصلاً، ويدور على صحاب جداد، ممكن يضيّع على نفسه فرص عظيمة، علشان هو بس ملهوش مزاج النهاردة. فرصة عظيمة … وملهوش مزاج، فـ راحت.

نصيحة: غيّرى من نفسك، شعرك، ستايل لبسك، تفكيرك، غيّرى نفسك، اتحولى، اعملى شغل Abra Cadabra كده، اقلبى مرة مارلين مونرو، ومرة زينات صدقى. عايزاكى تنوّعى كده لحد ما انتى كمان تجيلك شيزوفرينيا وتنسي انتى مين. وآه… اشترى شوية كتب واقرى الملخص اللى فى الجلدة اللى ورا… هـ تحتاجى ده.

٤. السرطان

٢٢ يونيو – ٢٣ يوليو

عارفة قبل ما الـ period بتجى لك بتبقى عاملة إزاى؟ أيوا! هو ده السرطان. Mood swings 24/7، مزاج متقلب زى بحر الساحل الشمالى، تلاقى البحر جميل، وبعد أول غطس، تلاقى دوامة وسحب. بيصحى الصبح طايق/مش طايق نفسه، ولما بينام بيبقى عكس ما صحى من النوم.

بيحب الناس، بس ما يمنعش أن موده مش بيسمح إنه يحتك معاهم. عنده لخبطة وكركبة فى مشاعره، مضروبة زبادى خلاط.

طبعاً، راجل السرطان بيسبب لك طابع درامى فى حياتك، مش محتاجة تليفزيون. أكشن، دراما، كوميدى، أفلام رعب، كله حاضر. وخدى بقى أفورة للصبح، أفورة فى الضحك، أفورة فى العياط.

 نصيحة: هشّكيه، وبشّتكيه، ويوختى يوختى. احتويه وحمّيه، دلّعيه وولّعيه، إبقى ماما وبابا، وطنط سعاد، وعمو حمدى. وطبطبى وكبرى وخلي شعارك: Save your drama for your mama. وقلبى معاكى يا ضنايا.

٥.  برج الأسد

٢٤ يوليو – ٢٣ أغسطس

ليه بتعملى فى نفسك كده؟ هاه؟ ليه؟

مركز إنتباه العالم كله، بيحب كل الحاجة الكتيرة، كل ما الحاجة كترت وكبرت كل ما كانت أحسن. وكل شئ عنده مبالغ فيه، لما بيحب بيحب، ولما بيكره بيكره. والتعامل مع سلبياته شئ مؤلم لكى لكثرة المبالغة.

انسان مش عميق، حبه واهتماماته سطحية.

كلمة السر :الغرور.

عنده عزة وحب للنفس لدرجة الغرور، وهو منفعل قلبه قاسى، ومتحكم جدا، بيتحكم لمجرد فكرة التحكم. عايز يبقى ريس المركب بالعافية، وبيحب يتفشخر ويتمنظر بنفسه. وبيحب يحس إنه فخم و Royal، مش بيحب النقد، بالعكس بيحب التعر**، و الـAss kissing.

مبصبصاتى، وبيحب النسوان زى عينيه.

نصيحة: حسسيه ان فيه 7,202,000,000 غيره فى العالم. وان الحياة على فكرة عادى وpeace والناس عايشة زيه، ويمكن أحسن منه كمان.

ملحوظة: رجالة الأسد مش هـ يقبلوا الكلام ده على نفسهم.

٦.  برج العذراء

٢٤ أغسطس – ٢٣ سبتمبر

وسعى للخبير الإستراتيجى والمحلل السياسى العريق. رجل العذراء فاتح مركز أبحاث، واستكشافات فى مخه. وانتى قايمة تعملى كوباية الشاى هـ تلاقيه فكر، وحلّل، وفسر، واكتشف، ووصل لإستنتاج قبل ما المية تغلى على النار. بيدقق فى كل التفاصيل، وفسافيس الحياة.

وكل حاجة فى حياته PERFECT ولازم تمشى بالمسطرة.

فكرى تتخانقى معاه كده. مستحيل توصلى لحاجة أصلاً. بيعرف يرتب كلامه وأفكاره، فـ هـيغلبك بسرد كلامه. علشان عنده ١+١ = ٢ يا هانم.

عينيه غريبة. دايماً لها شكل مختلف من كتر التفصيص والتدقيق فيكى، وفى الحياة، وفى نفسه. لو ضفر من ضوافرك مش مبرود زى الباقى. إوعى تستهبلى وتقولى مش هـ ياخد باله! ومش معنى كده إنك لما تغيرى لون شعرك، وتتشيكى، وتلبسى، هـ يقولّك “واو انتى جميلة”، لأ طبعاً! هـ يقولّك “خلى بالك البلوزة اتنتشت منك”. توقعى بخل حاد و برود فى المشاعر. هو بيعمل الفعل، وبيعرف يحط الخطط. هـ يتعامل معاكى كانك الكومودينو اللى جنب السرير.

نصيحة: سيبيه فى حاله، تعاملى إنه مش معاكى أصلًا.، كلمى نفسك وحاوريها. حبى نفسك، ودلّعى نفسك، وطبطبى على نفسك، خرّجى نفسك، واشترى لنفسك هدايا. يمكن بعد عناء طويل يترحرح.

٧.  برج الميزان

٢٤ سبتمبر – ٢١ ديسمبر

أول ما تصحي من النوم… قبل ما تفركي عينيكي، كلميه واسأليه عن الـMood بتاعه… و انتي تقدري تتوقعي يومك هيمشي إزاي… انتي و مزاجه…

 رجل الميزان… بااااارددددد… كسسوووووول جداً، مش عشان هو جسدياً مأنتخ… لأ… بس عشان هو مش عايز يتعرض لأي ضغط نفسي أو عاطفي… فـ بيهرب في حجة كسله و إنه تعبان و مش قادر… لو شايلة منه وعايزة تطلعي اللي جواكي… مش هيواجهك… هيختفي… مش هيرد..نام بقى… إتشغل في الشغل بقى.. و كده انتي فاهمة.

بيحب الجمال و تبقي متأنتكة و حاطة ميكياج و آخر شياكة.. و هو كمان بيحب منظره و شياكته… و عادي هيصرف على ده مش هيستخسر في نفسه… و عادي تلاقيه بيقف قدام المراية أكتر منك… و بيقولّك “تعالي شمال شوية عشان مش شايف نفسي في المراية”… المظاهر الخارجية عاملاله أزمة… كلام الناس ممكن يقدم ويأخر معاه جداً… و طبعاً لما هتخرجوا و تروحوا تتعشوا عشوة جميلة… و يبقى نفسك تتكلموا و تحبوا في بعض… هتلاقي نص الوقت ضاع على هو هياكل إيه لإنه مش بيعرف يقرر.

نصيحة: عايزة تحيريه؟ اديله إختيارين… وسيبيه يتسحل في الحوار ده.

٨. برج العقرب

٢٤ اكتوبر – ٢٢ نوفمبر

أقولّك إيه؟ ما هو عقرب… ملتوي و مناور و بيلف و بيدور و مش بيديكي حق و لا باطل… و مش هتعرفي تمسكي عليه حاجة… و هوب!! يقرصك… و يخلع ولا كإنه هنا… عارف نقط ضعفك و بيشتغل عليها عشان يوصل للي عايزه… بيشيل في قلب نفسه جامد و هيفضل فاكرلك كل حاجة و هيستنى الفرصة إنه ينتقم منك أو يردهالك أو يثبتلك إنك ضايقتيه أو أذيتيه، مخبي جواه بلااااوي زرقة… مغارة فيها تعابين و خفافيش و صراصير… ماتعرفيش تدخليها أبداً، بيحب يكتم جداً و غيور و هيحب يمتلكك بس مش بالطريقة التقليدية… هو هيخليكي تتصرفي و انتي هبلة و فاكرة إنه ده بإرادتك… بس هو اللي حرّك الدنيا و الظروف المحيطة و المسائل عشان تعرفي تاخدي القرار ده. بيمّن عليكي بشوية تفاصيل عشان تفشخ دماغك و تبقي قاعدة هتتجنني و كتر التفكير يبهدلك.

عارف يتحكم في نفسه و أعصابه و مشاعره و انتي قاعدة بتتنططي زي القرد قدامه، بس لما بيفتحها… بتبقى قنبلة هيروشيما إنفجرت. بيحب جداً بطريقة مبالغ فيها… و بيكره بطريقة مبالغ فيها جداً. عنده يا أبيض يا اسود، مع الإعتذار للمطربة لطيفة.

نصيحة: يا تبقي عقربة زيه… يا تسيبيه لصاحبة برج العقرب تاخده، يعني إدي العيش لخبازه.

٩. برج القوس

٢٣ نوفمبر – ٢١ ديسمبر

هوب هوب فى السريع! يالا نحب بسرعة، يالا ناكل بسرعة، يالا نشرب بسرعة، فى السريع السريع، وهوبا قفزة سريعة فى الإستنتاجات، مش مهم يحلل ولا يفكر، قراراته بتبقى غلط فى معظم الأحيان. وبيفرض رأيه على الناس واللى حواليه، مش لازم بطريقة واضحة. وبيبقى متشدد فى رأيه.

متسرع وملهوش خلق ولا صبر، ومتهور، وطائش، وفيه حتة إهمال. وبياخد قرارات ملهاش لازمة، وبيجازف من غير ما يحسبها. مش بيحاسب على كلامه، وساعات بيقول كلام دبش مؤذى جداً. بيهتموا بالمظاهر جداً، وبتفرق معاهم، وبيتأثروا بده. مدة إنبهارهم وإعجابهم قصيرة قوى، وده بيخليه متذبذب، ومش ثابت، ولا مستقر. مش بيخلص حاجة ولا بينجزها، لإنه بيكبّر دماغه منها فى السريع. ساعات ثقته فى نفسه الزايدة بتبقى غير مبررة، ومابيبقاش عندك فكرة جابها منين. وبيبقى فاكر إنه ممكن بقوة راجل واحد يحتل العالم زى ما بريطانيا احتلت مصر.

نصيحة: قومى اعملى كوباية شاى كده، وسقسقى فيها شوية بسكوت.

١٠.  برج الجدى

٢٢ ديسمبر – ٢٠ يناير

دايماً مش متفائل، وبيحبط نفسه، وفى اللى بيعمله. ومش شايف إنه بيوصل لأى حاجة، لإنه مش بيوصل لدرجة الـ perfectionism اللى فى دماغه. يا سيدى عادى، بس مش العادى أن أنا كمان أتنكد والعلاقة تتنكد معانا. دماغه ناشفة زى الجدى، يخبط ويهبد راسه ومفيش مشكلة معاه تماماً. وصعب يغيّر طريقة تفكيره ونظرته للحاجة. ممكن يكون خجول، أو مش هـ يساعد صحابك إنهم يحبوه، لإنه ماعندهوش المهارات الإجتماعية الكافية إنه يتعامل معاهم. وطبعاً بما إنه مجتهد فى حياته وشغله، فهو شايف إنه أحسن من غيره كتير، وإنه يستاهل أكتر من أى حد، وإنه مختلف عن الناس اللى حواليه. طبعاً هـ نحب نعزيكى، ونترحم على المشاعر و الـ emotions لإنه هو شخصياً مش عارف يحب نفسه. ودايماً متوتر، وبياخد فى قلب نفسه، وبيضغط على نفسه، ومن الآخر فاشخ نفسه، فـ طبيعى موده مش مظبوط من كتر الجز على سنانه. مش بيحب ياخد أى risk. كلاسيكى لدرجة غريبة، ومش بيرحرحها، ومش بس بيمشى جنب الحيط، لأ، ده هو الحيطة نفسها بنشفان دماغه ومشاعره.

نصيحة: اربطى منديل على راسك، خدى حباية صداع، واقعدى فى الأرض، واندبى على حظك.

١١.  برج الدلو

٢١يناير – ١٨ فبراير

هو أصلاً شهر فبراير بيخلص بدرى بدرى، الكون مش عايز ناس كتيرة تبقى من البرج ده.

رجل الدلو بيعانى من حالة توحد وجدانى، وإنفصال ذاتى عن الحياة. عادى… ممكن تنامى تصحى ماتلاقهوش أساساً، ولا كإنه كان موجود، وعادى يبقى عنده انفصام واضح وصريح وتناقض. يقدر يخليكى تروحى تقعدى مع دكتور نفسانى، النهاردة بيحب حاجة، بكرة يصحى يبقى بيكرهها، ومش بيكرهها بس، لأ هو بينكر إنه حبها فى يوم من الأيام. بنى آدم عنده كمية من الأفكار العظيمة، والمشاريع الـ creative بتنتهى مع انتهائه من الحديث عنها، خلاص، زهق.

كلمة السر: الزهق.. بيزهق: من نفسه، من لبسه ومن شعره، ومن شكله، ومنك، ومن بيته، ومن أمه، ومن أهله، ومن شغله، ومن حياته. بس بكرة هـ ينام ويقوم هـ يبقى مبسوط وعادى، ومش واخد باله من اللى اتعك امبارح. هو عامل زى العصفورة “فى العشة ولا طارت”؟. أول ما تقربى منه هـ يطير. وطبعاً كل القرارات والمشاريع اللى فكرتوا تعملوها مع بعض هـ تكون طارت معاه. إنسان متشدد فى كل حاجة، بيحب قوى وبيتعاطف قوى، وبيدى قوى، وبيساعد قوى. بيزعل قوى ويُحبط قوى، ويتخنق قوى وينعزل قوى. كل حاجة قوى. بيحب أى حاجة غريبة ومُريبة، ومش مفهومة. وعادى تصطاديه بيقرا مقالة عن كيفية حلب البقرة، أو فيديو لتكاثر سمكة الـ Ray النادرة، وهكذا. وطبعاَ ده كله بيلخص إنه انسان صعب تتوقعى هو مين أساساً، ولا هو بيحب إيه ولا هو عايز إيه؟ اسأليه إيه أكتر أكلة بيحبها، اسأليه تانى بعدها بشهرين، هـ تلاقى إجابة مختلفة.

نصيحة: خديه كده زى ما هو على قد الحاجات اللى بيعملها، حاولى تقبلى ده، لإنك مش هـ تلاقى خريطة، أو تفسير كونى للى بيعمله وبيقوله. تعاملى معاه على إنه Special case، بالعكس ده هـ يسليكى والله. حاولى.

ملحوظة: أنا برج الدلو و حاسة بيكم كلكم.

١٢.  برج الحوت

١٩ فبراير – ٢٠ مارس

عايش فى الـ لا لاند، فوق السحاب، بيحلم بيحلم، وبيحلم أحلام فى حياته الواقعية شبيهة للوهم والهلوسة. عادى تدخلى عليه تشوفيه بيبص من الشباك بإنبهار على عم عبده البواب وهو شايل أكياس الخضار. عايز يفصل عن الحياة المؤلمة والواقع بتاعها. حساس جداً بطريقة بتلخبطك، وبتبقي خايفة تمدحيه لا تجرحيه. أى كلمة أو حركة بتتقال بتتاخد على مشاعره وإحساسه، وبتكون مؤذية ليه، ثقته فى نفسه ضعيفة. فإنتى بتقعدى كل يوم تفكرى إيه اللى هـ ببتيه علشان يبقى كده؟ مش يمكن من الكلام اللى قولتيه؟ مش يمكن علشان لما جابلك ساندوتش شاورما لحمة وقولتيله “sorry أنا مابحبش اللحمة، أنا كنت طالبة فراخ”؟ مش يمكن لما بعتلك على الواتساب شوفتى الـmessage وماردتيش؟ مش يمكن؟ عايش فى عالم مثالى ومنسحب فيه، اتقى موده، لإنه لو قرفان هـ يقرفك معاه.

بواسطة نهلة النحاس  theglocal

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

5 × 1 =