كتب: أحمد حامد دياب

المصدر: هن (الوطن)

تلقت الإعلامية رضوى الشربيني في برنامجها “هي وبس” المذاع عبر فضائية “CBC سفرة” اتصالًا من فتاة تدعى مروة تشكو فيه من عدم معرفتها بقيمة راتب زوجها.

وقالت “مروة” للشربيني: “إحنا من غيرك ولا أي حاجة وانتي العقل المدبر لستات مصر مش قادرة أقولك أنا بتفرج عليكي ومتابعاكي على طوول وجوزي بيتخض لما بيعرف اني بتفرج دلوقتي على رضوى الشربيني ودايمًا يقولي رضوى الشربيني ربنا يستر وهو عارف انك العقل المدبر لينا كلنا”.

وأضافت مروة أن لديها مشكلة مع زوجها التي تزوجته زواج صالونات منذ 5 سنوات، قائلة: “دلوقتي أنا جوزي بيخبي مرتبه مني معرفش منه أي حاجة وبالصدفة عرفت هو بيقبض كام وبعد ما عملت عشانه كل ده محستش انه عوضني أي حاجة وهو معرفني انه بيقبض مثلا 100 جنيه لا هو بيقبض أكتر ومعرفني انه بيقبض 100 جنيه بس مثلا يعني”.

الشربيني أرجعت الخطأ على المتصلة نفسها قائلة: “هتزعلي مني؟ الغلطة غلطتك أنك عودتيه على كده”.

ونصحت الشربيني المتصلة بالامتناع عن إعدادها أكل لزوجها وتنظيف المنزل وإحضار أي شيء يخص المنزل: “مش هتجيبي حاجة خالص وفين المية مفيش مية فين الأكل مفيش أكل”.

وتابعت الشربيني: “هتأكلي نفسك والبيبي.. وجوزك هيدخل البيت لا فيه أكل ولا فيه مية ولا فيه حاجة خالص وبقولك إيه البيت مش نضيف قولي له معيش فلوس أجيب حاجات مستحضرات التنضيف”.

واعتبرت الشربيني أنها بذلك ستضعه أمام الأمر الواقع على حد قولها: “حطيه قدام أمر واقع طالما هو مقتدر ومعاه فلوس أنه يصرف عليكي”.

وزعمت الشربيني أن الشرع يحتم على الزوج أن يحضر الأكل لزوجته جاهز وأن الزوجة غير ملزمة بالطبخ لزوجها: “حبيبتي هو شرعًا قبل ما هختم معاكي أنا لسة أمبارح كنت بتفرج على فيديو لشيخ بيقول إن فكرة أن الراجل يصرف ويجيب فلوس ويبقى مسؤول عنك في الدين الإسلامي يعني أنه هو ميجبلكيش الرز والزيت والبصل وانتي تطبخي لا يا ماما طلع يجيب لك الأكل جاهز”.

واستطردت الشربيني: “قانونًا وشرعًا وإنسانيًا المفروض اني بعد ما أنا وقفت جنبك أنت تعوضني لو معوضكيش مبقولكيش اطلقي ومبقولكيش سيبيه بس بقولك أجبريه ورجعيه على التراك المظبوط وعلى الطريق الصح هيدخل بيت مش هيلاقي أكل”.

يذكر أن رضوى الشربيني نالت شهرة واسعة بسبب بعض الفيديوهات المنتشرة لها على وسائل التواصل الاجتماعي، ويعتبرها البعض “عدوة الرجال”.

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

ثلاثة عشر − ثلاثة =